Qəzet müxbiri tibbdə yeni ixtira etmiş alimdən:
- Siz bu ixtiranız üçün ən çox kimə borclusunuz?” — deyə soruşur. Alim bu suala
- Anama — deyə cavab verir və davam edir:
Uşaq vaxtı soyuducudan süd götürmək istəyəndə şüşə əlimdən sürüşüb düşdü. Hər tərəf süd gölünə çevrilmişdi. Anam mətbəxə gəlib məni cəzalandırmaq əvəzinə: "Nə gözəl bir iş görmüsən. Əvvəllər heç belə süd gölü görməmişdim. İndi yəqin ki, südü təmizləməzdən əvvəl onunla oynamaq istəyəcəksən”, — dedi. Sonra mən də, anam da yerə tökülən südlə oynadıq.
Bir azdan anam: "Artıq südü təmizləmək vaxtıdır. De görüm, südü nə ilə təmizləmək istəyirsən? Süngərdən istifadə edək, yoxsa parçadan?” — deyə soruşdu. Mən süngəri seçdim və birlikdə yerə tökülən südü təmizlədik. Sonra anam: "Bilirsən, sən südlə dolu şüşəni qaldıra bilmədiyin üçün bu hadisə baş verdi. İndi birlikdə həyətə gedək və şüşəni su ilə doldurub- götürməyi öyrənək”.
Bu hadisə mənim üçün böyük bir dərs oldu. Bundan sonra səhv etsəm də qorxmadım. Əksinə, hər bir səhvin yeni bir şey öyrənmək üçün gözəl bir fürsət olduğunu anladım. Əslində elmi təcrübələrdə də belədir. Bir təcrübədə uğursuzluğa məruz qalırsan, ancaq əvəzində o təcrübədən çox qiymətli məlumatlar əldə edirsən.
Nə uğursuzluqdan, nə də səhvlərinizdən qorxun. Bunu yeni fürsət kimi dəyərləndirib, yeni üsullar öyrənin. Artıq necə uğursuz olduğunuzu, nədə səhv etdiyinizi gördünüz. Üzülmək yerinə davam etmək üçün qollarınızı çırmalayın. Uğur sizi gözləyir!
Korrektor: Əliyeva Aynur