Böyük şirkətlərin əksəriyyəti sizi işə qəbul edərkən cv-nizdən əvvəl onu göndərdiyiniz poçt ünvanına diqqət edirlər. Əgər sizin poçt ünvanınınız professional standartlardan kənardırsa, yəni orada öz adınızdan deyil, ləqəbinizdən və yaxud da digər-qeyri ciddi simvollardan istifadə etmisinizsə, bu zaman həmin şirkət də sizin cv-nizə, imzanıza qeyi-ciddi yanaşır. Buna görə də hazırkı dövrdə böyük şirkətdə çalışmaq istəyirsinizsə, ən birinci mail ünvanınızı peşəkar standartlara uyğunlaşdırmalısınız. Ancaq bu hələ işin ilk mərhələsidir. İndi sizə növbəti mərhələ - iş mühitində peşəkar yazışma forması haqqında bəzi məsləhətlət vermək istəyirik. Həm öz iş yoldaşlarınız, həm də digər korporativ şirkətlər arasında işgüzar imic yaratmaq istəyirsinizsə, aşağıda qeyd olunan məsləhətləri diqqətdən qaçırmamanızı tövsiyə edirik.
1. İşgüzar məktubun başlanğıc və ən vacib hissəsi hörmət əlaməti olaraq bu poçtu qəbul edən şəxsi və onun təmsil etdiyi şirkəti salamlamaqdır. Məktubun məzmununa baxmayaraq bu hissə bütün işgüzar məktublarda istifadə olunmalıdır.
2. Digər unutmamalı olduğunuz bir məsələ də dostlarınızla deyil, iş yoldaşınızla və ya digər bir şirkətin nümayəndəsi ilə danışmağınızdır. Əgər iş yoldaşınıza hansısa bir məsələ haqqında kədərləndiyinizi və ya sevindiyinizi bildirmək istəyirsinizsə, bu zaman müxtəlif smayliklərdən, ardıcıl verilən suallardan, nöqtə və ya nidalardan istifadə edə bilərsiniz. Amma bu hal iş mühitində məktublaşma zamanı arzuolunmazdır.
3. İşgüzar məktublar dəqiqlik tələb edir. Buna görə də çalışın ki, yazıda hər hansı qrammatik, leksik və ya orfoqrafik səhvlərə yol verməyəsiniz.
4. Yazıda elementar etika qaydalarına riayət etmək mütləqdir. Şirkətin səlahətli nümayəndəsi olduğunuzu unutmayın və hər cür situasiyada sakitliyinizi, peşəkarlığınızı qoruyub saxlamağa çalışın. Unutmayın ki, etdiyiniz hər hansı kobudluq və təhqir yalnız sizin adınıza deyil, ümumilikdə şirkətinizin adına xələl gətirə bilər!
5. Məktubu qəbul edənin sizin söylədiklərinizi tam başa düşməsi üçün fikirlərinizi aydın şəkildə ifadə etməlisiniz. Buna görə də cümləni ağırlaşdıran tərkiblərdən qaçın. İşguzar, bir o qədər də sadə mətn hazırlamağa çalışın.
6. Etik prinsiplərə uyğun olaraq yazılan məktubu etik qaydalara uyğun formada bitirməliyik. Buna görə də məktubun sonunda həmsöhbətinizə işlərində uğurlar və gününün xoş keçməsini arzulamağı unutmayın.